University of Wisconsin Digital Collections
Link to University of Wisconsin Digital Collections
Link to University of Wisconsin Digital Collections
Icelandic Online Dictionary and Readings

Víglundar saga: a new edition based on UW-Madison Libraries Special Collections MS 140 (2007-10-09)

Previous Previous section

Next section Next



 

[Chapter 2]

Þórir hét jarl sá er ríki átti at ráða í Nóregi; hann var ágætr hǫfðingi. Jarl var vel kvæntr ok hafði fengit ágætt kvánfang. Jarl ól við konu sinni eina dóttur sú er Ólǫf er nefnd; hon var þegar á unga aldri harðla kurteis. Hon var allra kvenna fríðust skǫpuð þeira sem þá váru í Nóregi. Af því var lengt nafn hennar ok var hon kǫlluð Ólǫf geisli. Jarl unni henni mikit ok hann var vandlátr við hana, svá enginn skyldi við hana tala af karlmǫnnum. Jarl lét smíða henni eina skemmu; hann lét vanda hana mikit at ǫllu smíði. Skemman var vel grafin ok gagnskorin, ok rennt silfr í skurðina. Þetta herbergi var þakit með blýi ok steini ok lúnat allt saman. Skíðgarðr var um Page Image skemmuna hár ok læst garðhliðit með sterkum jarnhurðum. Ekki var þetta hús at miðr gert utan en innan. Þessa skemmu byggði jarlsdóttir ok hennar þjónustumeyjar. Jarl sendi nú eptir þeim konum sem hann vissi hagastar ok lét kenna dóttur sinni allar kvennmannligar listir þær sem þá váru kurteisum konum tíðar í þann tíma. Ok þat hugsaði jarl sem honum gafsk raun á, svá skyldi dóttir hans bera hannyrðir af hverri konu sem hon væri þeim fríðari. Nú líða svá fram stundir. En þegar hon hafði aldr til at þroska, vǫldusk til margir ágætir menn at biðja hennar, en jarl var mjǫk kostvandr vegna dóttur sinnar, ok kom enginn sá fram at hann vildi gipta honum hana, ok vísaði þeim frá með hœverskum svǫrum, ok ǫngvan mann sigraði hon með orðum eða gerðum. Leið svá fram langar stundir, ok hafði jarls dóttir allra manna lof.

Previous Previous section

Next section Next




Go up to Top of Page