University of Wisconsin Digital Collections
Link to University of Wisconsin Digital Collections
Link to University of Wisconsin Digital Collections
Icelandic Online Dictionary and Readings

Víglundar saga: a new edition based on UW-Madison Libraries Special Collections MS 140 (2007-10-09)

Next section Next



 

[Chapter 1]

Page Image Haraldr inn hárfagri var sonr Hálfdanar svarta. Hann var einvaldskonungr yfir Nóregi er saga þessi gerðisk. Hann tók ungr konungsdóm. Haraldr var allra manna vitrastr ok vel búinn at ǫllum íþróttum þeim sem konungs tign byrjaði. Konungr hafði mikla hirð um sik ok valdi þar til ina ágætustu menn þá sem reyndir váru at *mikilli harðfengi ok mǫrgum frægðarverkum. Ok svá sem konungr girntisk at hafa með sér it bezta mannval, þá váru þeir at ǫllu betr haldnir en nǫkkurir menn í landinu, því konungr sparði hvárki við sína menn fé né fullting ef þeir kunna at gæta. Eigi var með minna móti at þat hlýðzk ǫngum í móti at gera konungs vilja. Sumir urðu landflótta fyrir honum en sumir drepnir, ok kastaði konungr sinni eign á allt þat þeir áttu eptir. En margir mikilsháttar Page Image menn þoldu eigi álǫgur konungs ok flýðu ór Nóregi, þeir sem váru af stórum ættum, ok vildu heldr flýja óðul sín en liggja undir ánauðaroki konungs, ok leituðu til ýmissa landa. Á hans dǫgum byggðisk mjǫk Ísland, því þangat flýðu þá margir mikilsháttar menn þeir er eigi þoldu ofríki Haralds konungs.

Next section Next




Go up to Top of Page