Hátt menntunarstig

Á Íslandi er menntunarstig tiltölulega hátt. Um það bil 50% hvers árgangs ljúka stúdentsprófi, 16% Íslendinga á aldrinum 25-64 ára hafa lokið háskólaprófi. Auk þess hafa önnur 16% lokið sérskólamenntun á háskólastigi.

Kynning á framhaldsnámi fyrir almenning við Háskóla Íslands (Further studies being introduced to the public at the University of Iceland).

Á síðari árum hafa þekking og rannsóknir í auknum mæli orðið grundvöllur verðmætasköpunar. Í stað þess að treysta nær eingöngu á auðlindir, einkum gjöful fiskimið og næga orku sem framleiða má með vatnsafli og jarðhita, beina Íslendingar nú sjónum sínum að nýjum möguleikum á sviði líftækniiðnaðar, hugbúnaðar, tölvuvinnslu og lyfjaframleiðslu.

Þekktasta og umdeildasta dæmið um slíkan þekkingariðnað er fyrirtækið Íslensk erfðagreining. Það starfar að erfðarannsóknum og meingenagreiningu í samvinnu við erlenda fjárfesta. Með rannsóknum á sviði erfðagreiningar er ætlunin að þróa ný lyf og aðferðir við að lækna og fyrirbyggja arfgenga sjúkdóma. Íslensk erfðagreining hefur fengið einkaleyfi til að starfrækja stóran miðlægan gagnagrunn sem í á að safna heilsufarsupplýsingum allra Íslendinga ásamt upplýsingum um látna Íslendinga sem byggja má á eldri gögnum og lífsýnasöfnum.

Hátt menntunarstig hefur leitt til framþróunar og nýsköpunar á fleiri sviðum en í erfðafræði. Á undanförnum árum hafa íslensk fyrirtæki haslað sér völl í ýmiss konar hátækniiðnaði. Dæmi um slík fyrirtæki eru hugbúnaðarframleiðendur, og fyrirtæki sem framleiða hátæknibúnað til nota í sjávarútvegi.