Jarðhiti

Landið er auðugt af jarðhita og eru laugar og hverir víða um landið. Sumir þessara hvera gjósa og er Geysir í Haukadal þeirra frægastur. Hið alþjóðlega hugtak geyser er dregið af nafni hans.

Vatnsmesti hver Evrópu, Deildartunguhver í Borgarfirði, gefur 180 l/s af 97°C heitu vatni. Hann sér Akranesi og Borgarnesi fyrir heitu vatni til húshitunar.

Hitaveitur eru nú víða um land og sjá 80% þjóðarinnar fyrir heitu vatni til þvotta og húshitunar. Þá er jarðhitinn nýttur til ræktunar og í gróðurhúsum, sem hituð eru með jarðvarma, eru ræktaðar ýmiss konar erlendar tegundir ávaxta og grænmetis, s.s. tómatar, gúrkur og jafnvel bananar, auk alls kyns jurta. Þá er jarðvarmi einnig nýttur við fiskeldi.

Frá fornu fari hefur lauga- og hveravatn verið notað til þvotta og baða. Snorralaug í Reykholti er t.d. talin hlaðin á 13. öld að frumkvæði Snorra Sturlusonar.

Snorralaug í Reykholti (Snorralaug in Reykholt).

Helsti sundstaður Reykvíkinga, Laugardalslaugin, er við Þvottalaugarnar í Reykjavík, þar sem reykvískar konur þvoðu áður þvotta sína. Það var áður en heitt vatn var leitt í hús en það var einmitt við Þvottalaugarnar sem fyrst var borað eftir heitu vatni til húshitunar árið 1928.