Mannfjöldi á Íslandi

Íbúar á Íslandi eru um 280.000 (2002). Mikill meirihluti landsmanna býr á höfuðborgarsvæðinu. Þar hefur orðið stöðug fólksfjölgun hin síðari ár, og raunar á öllu suðvesturhorni landsins. Þessu fylgir gríðarleg byggðaröskun, því fólki fækkar að sama skapi í öðrum landshlutum. Á höfuðborgarsvæðinu búa yfir 60% landsmanna, á Norðurlandi eystra eru tæp 10% íbúanna og um 7,5% á Suðurlandi en í öðrum landshlutum er hlutfallið enn lægra.

Reykjavíkurtjörn um sólsetursbil (Reykjavík Pond at sunset).

Mikil einbýlishúsamenning er á Íslandi. Flestir kjósa að búa í einbýlishúsi eða raðhúsi en minna er um fjölbýlishús. Þetta hefur m.a. haft það í för með sér að borgin teygir sig yfir fremur stórt landsvæði miðað við íbúafjölda og háreistar byggingar eru heldur fágætar. Fremur lítið er um leiguhúsnæði og húsaleiga á höfuðborgarsvæðinu hefur verið mjög há.