MILLI 25 og 30 þúsund manns tóku þátt í dagskrá Hinsegin daga, eða Gay Pride, sem voru haldnir í fjórða sinn í Reykjavík um helgina. Líf og fjör var í fjölmennri skrúðgöngu sem fór niður Laugaveg á laugardag og endaði á Ingólfstorgi þar sem boðið var upp á fjölmörg skemmtiatriði.

Að sögn Heimis Más Péturssonar, framkvæmdastjóra Hinsegin daga í Reykjavík, fór þátttaka í dagskránni í ár fram úr björtustu vonum aðstandenda. Hinsegin dagar hófust með tónleikum og uppákomu á skemmtistaðnum Spotlight á föstudag, en hápunktur skemmtunarinnar var á laugardag, þegar fjölmenn skrúðganga hélt frá Hlemmi áleiðis á Ingólfstorg.

Fólk frá útlöndum og hópar utan af landi

"Ég geri ráð fyrir að þeir sem alls tóku þátt í þeirri skemmtun hafi verið á bilinu 25 til 30 þúsund manns sem er enn fleira fólk en tók þátt í deginum í fyrra. Það er nokkuð um að fólk komi erlendis frá til að taka þátt í þessu með okkur og það er að aukast þar sem við höfum verið iðin við að kynna hátíðina í útlöndum," segir Heimir.

Hann segir að skipulögð atriði í göngunni niður Laugaveginn hafi verið rúmlega 30 og nokkur hundruð manns hafi tekið þátt í þeim. Mikil vinna sé að undirbúa hátíð sem þessa, undirbúningur taki 10 til 11 mánuði.

Heimir Már segir að fyrir utan slysið sem varð þegar skyggni hrundi á Ingólfstorgi hafi allt farið vel fram. Meira hafi verið lagt í hátíðina en fyrr, bæði atriði á sviði og í göngu. Þá hafi í fyrsta sinn verið áberandi þátttaka utan af landi en frá Akureyri hafi komið 15 manns með skipulagt atriði og einnig hafi hópur frá Ísafirði verið á staðnum.